Oroitz Zabala (lehena, eskuinetik) Ateak Ireki webgunearen itxiera salatzeko agerraldi batean
"Ahotsa Behar Dugu", interneten hedabide bat sortzeko ekimena da. Nafarroako herri eragileen berri emanen duen ataria, komunikazio proiektua.
Oroitz Zabala kazetariak xehetasun hainbat eman dizkigu, Metropoli Forala saioan komunikazio proiektuari buruz.
“Interneten ipiniko ditugu jasotako irudiak. Guk hartutakoak eta herritarrek igorritakoak. Auzolana bultzatu nahi dugu. Guztion artean eginiko hedabidea egin nahi dugu. Horretan asko laguntzen du teknologia berrien zabalpenak”. Hala esan digu Oroitz Zabalak.
Zizurko kazetariaren esanetan, Nafarroa izanen da Ahotsa Behar Dugu hedabidearen lan eremua. “Eskualde guztietan zabaltzen ari gara berriemaileen sarea. Herri mugimenduekin ere harremanak lotzen ari gara”.
Crowdfunding-a abian jarri dute
Proiektua mamitzen ari dira, eta finantzazio bila dabiltza. Internet bidez diru bilketa egiten ari dira, Goteo izeneko plataforman. Gutxienez, 12000 euro biltzea dute helburu. Kopuru horretara iritsiz gero, Hogei milara iristeko bigarren epe bat zabalduko lukete. 11 egun falta zaizkie hamabi mila eurora iristeko. Eta lortuak dituzte 9000.
Oroitz Zabalak gogoratu du Ahotsa eta laguntza ekonomikoa behar dituztela proiektua bideratzeko.