Etorkizunari begira jarri dira Geroa Baiko eledunak asteburuan egin dituzten ekitaldietan. Tafallan hitzaldia egin zuten lehenbizi eta Ribaforadan ekitaldi politikoan bildu ziren gero. 2015. urteko hauteskundeei so jarrita, birsorkuntza politikoa eta ustelkeriaren aurka lanean aritzeko beharra nabarmendu dute Geroa Baiko eledunek.
Elkarrizketan eta elkarbizitzan jarri du soa: elkar ulertzera iristeko beharra nabarmendu du Barkosek, Nafarroa aniztasunera errespetuan bideratzeko. Uxue Barkosek, Manu Aierdik eta Koldo Martinezek hartu zuten hitza gainerako alderdikideen babesean eta Ribaforadako herritarren sostenguarekin.
Etorkizunean ausart
Edukiz beteriko ekitaldia izan zen, aurrera begirakoa. Azken bi urteotako lana baliatuta, etorkizunean ere indartsu, ausart eta ideia bete proposamena dute eskuartean.
Ausartak, politikoki eta ekonomikoki. Ez du batere erraz ikusten hori Barkosek, krisialdi ekonomikoak ez duelako laguntzen. Baina ongizate estatua mantendu nahi dutenek argi izan behar dute finantzaketa iturri berriak bilatu behar direla. Gizarteak behar dituen erantzunen bila joko dutela esan du Geroa Baiko buruzagiak.