Hamarreko handia. Horixe da dekalogoa. Gaurkotasunari erreparatzeko hamar modu. Puntuka aritu gara errealitatea aztertzen Santi Leoné historialari, irakasle eta idazlearekin. Oraingoan, dekalogoaren hari nagusia konplizeak izan dira.
Leoneren esanetan, pasa den astean Sarasate pasealekuan elkarren ondoan inolako konplizitaterik gabe ibili zirenak Urkullu eta Barcina izan ziren. Paseoan, bi argazki nabarmendu ditu: bata, foruen estatuaren azpian; bertzea, kamera eroriarena.
Beste politikari bat ere mintzagai izan dugu. Roberto Jimenez pozik dago PSOEren konferentzia politikoan gertatutakoarekin, batez ere PSNren berrindartze ideologikoa ekarriko duelako, jendeak berriz ilusioa eta itxaropena izanen duelako eta berreskuratuko delako UPNren gobernuarekin galdu den denbora guzia.
Historialari iruindarraren aburuz, “Jimenez ere UPNren konplize izan da eta izanen da”.
Bestalde, Doraemon eta Novita Holmes filma ailegatu da Iruñera. Leoneren ustez, “pelikulak gure konplizitatea eskatzen du, euskaraz ikusteko aukera ere badugulako”.