Haurtzaroa eta nerabezaroa babesteko programak baliabidez hornitzeko eta plangintza zehatza egituratzeko eskaera egin dute Iruñeko Udaleko lan alor horretan dabiltzan profesionalek. Izan ere, kritikatu dute, inprobisatzen ari direla euren egunerokoan eta gero eta baliabide tekniko gutxiagorekin ari direla zereginetan, noiz eta, hazi egin denean laguntza eske doazen familien kopurua.
Langileak kexu
Duela hilabete bat bildu ziren euren egoeraren berri eman eta eskaerak egitera Iruñeko Gizarte Zerbitzuez arduratzen den zuzendaritza taldearekin. Azaroaren 5ean elkartuko dira berriro. Zuzendaritzak proposamen zehatzak eta dauzkaten arazoei irtenbideak emateko baliabideak ematea espero dute.
Gaur egin dute aurreikusiak zituzten protesten artean azkena. Zuzendaritza taldearekin bilkura egin ostean, baloratuko dute protestekin jarraituko duten edo ez.