Argia ikastolako zuzendari Anika Lujan
Nafarroa Oinez festa nola joan den ikusita, pozik dago Anika Lujan Argia ikastolako zuzendaria: "Oso polita izan da jendearen erantzuna ikustea. Bihotzez eskerrak eman nahi dizkiet bereziki boluntario moduan lan egin duten guztiei, eta orohar Tuterara etorri diren denei". Nolanahi ere, ez da ausartzen Tuteran zenbat euskaltzale elkartu ziren eta haien eskutik zenbat diru bildu den esatera: "Badakit kazetariek zenbaki zehatzak nahi dituzuela, baina oraindik oso goiz da horretarako. Edonola ere, oso pozik gaude antolakuntzaren aldetik dena oso ongi joan delako". Nolanahi ere, argi du bildutako dirua tamalez ez dela aski izanen ikastolaren zorra kitatzeko: "Aurtengo Nafarroa Oinez festaren helburu nagusia ekonomikoa zen. Erriberan euskara ikus eta entzungai izatea ere garrantzitsua zen, baina batez ere dirua lortu nahi genuen gure 1,9 milioi euroko zorrari aurre egin ahal izateko. Eta argi dago bildutako dirua ez dela aski izanen. Laguntza gehiago behar dugu".