Iruñeko udal aktualitatea jorratzeaz gainera, Iruñerrikoan gertatzen denari ere begiratzeko ahalegin berezia eginen dugu Euskalerria Irratian denboraldi berrian. Helburu horrekin, Iruñerriko hautetsiekin solasaldia izanen dugu hamabostean behin, Metropoli Forala saioan. Gaur egin dugu lehendabizikoa. Mahaiaren bueltan: Barañain, Berriozar eta Zizurko hautetsiak izan ditugu.
Mahai gainean ekimen ugari
Barañainen, oposizioan, Oihane Indakoetxeadago EH Bilduko zinegotzi den heinean. Heldu den ostiralean izanen dute osoko bilkura eta arazoak eta ekimenak izanen dituzte aztergai. Azken hilabeteotan hizpide duten gaietako bat aparkaleku arautuarena da. Joan den maiatzean Iruñeak eremu urdina zabaldu zuenetik, arazoak sortu zaizkie Barañainen. Horiei irtenbidea emateko proposamen bat eztabaidatuko dute bilkura horretan.
Raul Maiza, Berriozarko alkate ordea da. Berriozarren gazteentzako eremu egoki baten beharra daukatela nabarmendu du Maizak, eta gaztetxe edo gazteleku bat sortzeko proiektuan lanean ari direla legealdi honen hasieratik. Zizur Nagusian, UPN dago aginte makilarekin. Udala geldirik dago Elena Petri Bilduko zinegotziak salatu duenez. Hirurak aditzeko aukera izan dugu Metropoli Forala saioan.
Irudia: eu.wikipedia.org