Argia aldizkariak utziriko argazkia
Patziku Perurena idazle goizuetarra izan dugu bisitari gaur Felipe Uriarteren Irrintzi mendi aterpean. Naturaz, baserriaz, baserriko kulturaz gogoeta interesgarriak oparitu dizkigu Perurenak. Bere hitzetan, "baserritarrak dira euskal kulturak dituen katedradunik jakintsuenak". Naturazale porrokatua da pentsalari goizuetarra, eta hori guztiz agerian geratu da gaurko solasaldian. Konparaziora, Goizueta eta Leitzako hegaztiez mintzatzeaz gain, haien kantua imitatu digu, zuzen-zuzenean. Egungo egoeraz, kulturaz ere gogoeta egin du Perurenak: "Egungo gizartea zuhaitzaren ostoen antzekoa da. Haizeak eramaten ditu ostoak, bazter guztietara zabaltzen ditu, baina inor ez da ohartzen zuhaitzaren zainez. Zuhaitzari sustraiek eusten diote". Goizuetarrak sustraietara jotzea eta han dagoena arakatzea ei du gustuko.