Bikromatikoa da argazkia, beltzez eta gorriz doaz bertan dauden guztiak. Beltzez ertzainak, burua kasko gorriz babestuta; beltzez Urtza Alkorta, soinean euritik babesteko plastiko gorria zulatuta eta piltzartuta.
Bikromatikoak dira atzo ertzainek Ondarroan egindako operazioari buruz politikariek egin dituzten adierazpenak ere; txaloak jo dizkiete gehienek, batzuek bazela garaia esanez gainera. Operazioa salatu dute ezker abertzalekoek, kontu eske Ertzaintzari eta lehendakariari.
Gurean ere bikromatikoa gertatu zen eztabaida. Lankide batek, telebistan ertzainek adineko emakume bati nola eraso egin zioten ikusita, ezin izan zuen oihu larria erreprimitu; beste lankide batek boteprontoan erantzun zion: ertzainak egin behar zutena betetzen ari zirela, han zeudenak, adinekoak izanda ere, bazekitela zer zetorkiekeen.
Atxiloketen kontrako ekintzak ez dira oraingoak. 1933an, EAJko mitinlari ziren Haydée Agirre eta Polixene Trabudua atxilotu zituztenean Bizkaiko gobernadore errepublikarraren aginduz, bermeotarrak joan ziren gau batean Larrinagako kartzela atarira, bi emakumeei babesa ematera. Hurrengo urtean, 1934an, “Soy revolucionaria” izeneko artikulua argitaratu zuen Polixene Trabuduak Jagi-Jagi aldizkarian. Gandhiren bidea, desobedientzia zibilarena, bere egiten zuen hor EAJko mitinlariak.