Igande honetan jai erreibindikatiboa dugu Villatuertan. Goizeko 10:30ean hasiko da egun osorako egitaraua. Adin denentzako jarduerak, musikaz blai. Sortzen Ikasbatuaz elkarteak antolatu du eta deialdia zabaltzen bestelako laguntzak ere izan ditu, euskalgintzaren gunearena eta baita ELA, LAB, ESK, STEE/EILAS, EHNE eta HIRU sindikatuena ere.
Duela hiru hamarkada, Nafarroa administratiboki zatitu zuten hiru zonaldetan. Eremu ez euskaldunean, batez ere, ume euskaldunen eskubideak ez dira bat ere bermatzen hezkuntza publikoan eta hori onartezina da. Ondorioak, beraientzat eta gurasoentzat: kilometroak errepideetan, arriskuak, dirua, denbora …
Zonifikazio kaltegarri horrekin lehenbailehen bukatu egin behar dugu. Nafar gizartearen zati zabal batek (euskalduna eta euskaltzalea dena baino handiagoa) begi onez ikusten du euskara eta euskaraz ikasteko eskubidea, behin eta berriro inkestek diotenez. UPN/PP ez bada, anima dezagun PSN bide honetan sar dadin.
Igandean eta Villatuertan aukera dugu bidean jauzi bat egiteko.