Espainiako Gobernuaren kartzela-politika negargarria salatu du Patxi Zabaletak. Bat heldu naiz Patxi Zabaletaren salaketarekin. Bide bitxia erabili du, hala ere, horretarako. ETAko militante idealistak eta GALeko mertzenario diru-goseak kontrajarri ditu leitzarrak. Ez dakit zer premia zuen hain putzu zikinean sartzeko. Buruan bala bat sartzen ziotenari bost axola zitzaion tiro-egilea ideiengatik edo diruagatik ari zen.
Ahantzi gabe bertze kontu bat: gustatu ala ez, GALekoei dirua ordaintzen zietenak ere beren ideien alde ari ziren lanean. Gustatu ala ez, Moralaren balantzan pisu bera du Euskal Herriaren independentziak edo Espainiaren batasunak. Gureagoak izanen dira batzuk bertzeak baino. Ez, ordea, Moralak benedikatuagoak.