Atzorarte, Nafarroako Bertsolari Txapelketak txapeldun bakarra zuela uste nuen. Baina aurtengoan bi izan dira: Xabier eta Silveira. Txapeldunak berak eman du pertsonalitate bikoitzaren berri
Gara egunkariari eskainitako elkarrizketa bikainan, Doctor Jekyll eta Mister Hyden bertsio gaurkotua eskainiz. Barrutik mintzatu da lesakarra oholtza gainean eraikitako pertsonai horretaz, Silveiraz, eta etxerako eta lagunarteko girorako gordetako besteaz, Xabierrez.
Eta ni, elkarrizketa ikusita, are gehiago poztu naiz larunbateko emaitzaz. Bertsolaritzak justizia egin duelaren sentsazioa izan dut. Pertsonai polemikoa izan da luzaroan Silveira. Polemika batzuk, berak dioen moduan, berak esandakoei “milaka punta ateratzearen” ondorio izanen dira, seguruena. Baina beste batzuk, argi esanda, berak irabazitakoak izan dira. Ez noa ni horiek zuritzera. Bertuteak bertute eta akatsak akats, bertsolaritzarekiko maitasuna erakutsi eta garai berrietara egokitzeko gai izan da Silveira, edo Xabier. Eta bere burua abandonatu gabe, gainera. Eta mailaz erakutsi du aldaketa hori, egokitzapen hori. Horregatik zait pozgarria txapela.
Gaur txapel batek apainduko du gure inguruko etxeren bateko pareta. Ez dakit zeini eginen dion ilusio gehien, Xabierri edo Silveirari. Baina nire aldetik, zorionak biei.
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!
