Zutik daude, txaloka, irribarre bat edo beste, baina zalapartarik gabe, emozioak gainezka egin ez dezan bezala. Batzuk perfilez, atzerantz begira, eserita ageri diren bizpahiruren aldera.
Lehenxeagokoa izan behar du bigarren argazkiak: pasilloan behera datoz PPko diputatuak, karpetak eskuetan, Alicia Sánchez Camacho buru dutela, musajea mutur bihurtuta. Ezezkoa eman eta alde egin dute, kutsatzeko beldurrez edo.
Hirugarren argazkian senyera izardunek jartzen dute kolorea kalean, neguko jantzi ilunen eta buru urdinduen artean. Parlamentu aurrean bezala, herrietako udaletxe atarietan ere elkarretaratzeak egin omen ziren arratseko zazpietan.
Argazkiak argazki, Penintsularen alde honetatik begiratuta, zenbat inbidia ez ote duten piztuko gaur irudi horiek. Itxaropenean luzatzen den inbidia. 2013ko urtarrilaren 23a historiako liburuetara pasatuko den data izango da, atzo iluntzeko argazkien lekukotzarekin.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!