Gauza jakina da nafar guztiok batzen gaituzten izenak, eta izanak, oso gutxi direla. Gutxi eta, gainera, kirolera mugatuak. Garai batean Indurain izan zen horietako bat, nafar guztiok harro sentitu baikinen atarrabiarren balentriekin: Frantziako bost Tourren irabazle izatea ez da, inondik ere, txantxetako gauza.
Armstrongek esan du tranparik egin gabe, hau da, debekaturiko sustantziarik hartu gabe, ezinezkoa dela Frantziako Tourra zazpi aldiz irabaztea. Eta bost aldiz, posible al da?
Eskerrak Osasunak asteburuan irabazi zuela. Eman dezagun Indurainen mitoa erortzen zaigula. Eta zorigaiztoak, gutxienez, binaka etorri ohi direnez, pentsa Osasuna bigarren dibisiora doala. Hori erabateko porrota litzateke, gure mundu foralaren akabera.