Amarru ederra egin diote Santiago Cerverari, gizajoa. Berak beti defenditu du Nafarroako Kutxaren garbitasuna eta ondradutasuna, eta horregatik salatu du behin eta berriro azken urteotan gertatu diren itsuskeriak, bera asmo oneko pertsona baita, batere tolesik gabea, fede onaren eredua, eta aprobetxaturik atzo Iruñean zegoela, kasualitatea, hurbildu zen, kuriositate hutsez, zuhaitz batera, abisua eman ziotelako, eta joan eta bila, beharbada datu gehiego lortuko zituen horrela bera hainbeste salatzen ari den politikarien eta Nafarroako agintarien ustelkeriari buruz, berak ez baitzekien ezer. Orain pena du bere alderdia kaltetu dezakeelakoan, bera Iruñean baitzegoen, kasualitate hutsa, eta bururatu zitzaiolako ustelkeriaren aurkako bere borroka zintzo eta saiatu horretan anonimo hori mugarri izan zitekeela. Santiago Cervera, gizajoa. Dena, amarru bat.
