Futbolean ez bezala, politikan bat irabazle izan daiteke, eta galtzaile aldi berean.
Horixe gertatu zaio Artur Masi. Apustu argia eta gogorra egin zuen, gehiengo osoa eskatu zuen ez ohiko egoerari aurre egiteko, eta hamabi eserleku galdu ditu.
ERC da hauteskundeetako irabazlea, baina Masekin hitzarmenik egiten ez badu, emaitza ez da batere gozoa izanen, independentisten helburuan aitzina egitea ezinezkoa izanen delako.
Hauteskundeotan politikariengandik hurbil dabiltzan soziologoek ere jipoi handia hartu dute, inoren iragarpena ez baitzen hurbildu igande gaueko emaitzara.
Dakizuenez, ekonomialariak forense bihurtu dira, etorkizunaz iritzia eman beharrean hildakoari zer gertatu zaion esatera mugatzen baitira. Ba, Kataluniako hauteskundeetako aurreikuspenak eta datuak ikusita, soziologoen ospea ere hortxe dabil, kazetarion mailan, gutxi gora behera.