Aitortzen dut, ez zaizkit gehiegi inporta Estatu Batuetako hauteskundeak. Batez ere, ez diodalako aldaketarako gaitasunik egozten hautetsietako bateri ere. Ez behintzat, norabide oneko aldaketarako. Galdetuko balidate, ados, onartuko nuke nahiago nuela Obamak irabaztea, txarrenetan onena delakoan. Baina batez ere, euren herrialdearen arduragabekerietaz inolako errurik ez duten herritarrekiko konpasioz lehenetsiko nuke hautagai demokrata. Ea arlo sozialean hobekuntza txikiren bat ekartzen dien.
Munduko gainerako herritarroi dagokionez, sentitzen dut, baina ez dut itxaropen handirik. Ordezkatze sistemaren bertsio anglosaxoia da estatubatuarra. Alderdi demokrata eta alderdi errepublikarra. Astoa, eta elefantea. Bata ala bestea. Baina beti berdin, hautagaiaren azalaren pigmentoaz harago. Hegemoniak indarrean jarraitzen du, eta hala jarraituko du ekaitz batek New Yorken eragindako hildakoak kontatzen ditugun bitartean, Haitin utzitakoak kontatu beharrean.