Nafarroako Parlamentuan, Aralar gelditu da Nafarroa Bai parlamentari taldearen jaun eta jabe. Eusko Alderdi Jeltzalekoa eta haren bidailaguna bidalita, 5 aralarkide eta urruti ibiliko ez den seigarrena gelditu dira taldean. Horrek bulegoa, bozeramailetza, batzordeetako presentzia eta bere iritzia agertzeko Parlamentu batek eskaintzen dituen mila baliabide utzi ditu, modu esklusiboan, Aralarren eskutan.
Dirua ere bai: parlamentari talde bati dagokionaz gain oso-osorik, batzordeetako presentzia horrek ematen duena. Bidalitakoek ez dute halako aisetasunik izanen, ez politika egiteko baliabideetan ez dirutan. Hauteskundeak eskatzen ari dira, aho batez, oposizioko talde guztiak Nafarroako Parlamentuan. Bildun sarturik, hauteskundeak gaur eginez gero, sei parlamentari aterako lituzke Aralarrek? Nago Zabaletak eta bere neska-mutikoek, beren barren-barrenean, oso legegintzaldi luzea opa diotela Barcinari.