Aitor Etxarte: JEL, epel

Merced kaleko teilatuen azpian euriaren hots kantaria izan dugu asteburuan. Udazkena gurean da bete-betean.

Irratiaren beste aldeko marmarrak hauteskunde arrotz-gertukoen berri eman digu. Atzerritik aditu ditugu zenbakien dantza.

Beraz, euripean izan garen asteburuan Jeltzaleek irabazi dute. Orduan patua etorri zait salbazioan: Bingen Ametzaga euskaldun-jeltzale historikoa. Koldo Izagirrek esan duen bezala exiliora joandako gehienak “euskaldun baino euzkotarragoak ziren”. Ametzaga zorioneko salbuespena izan zen. 1952. urtean Buenos Airesen idatzi zuen W. Shakespearen “Maitagarriaren kantua”-ren itzulpen dotorea:

“Zuek, mihi bikoitzeko suge natudunok,

kirikino lahartsuok, ez zaitezte agertu;

ez kalte egin ziraunok eta sugandilok,

gure Erreginagana, arren, ez hurbildu.

Urretxindor, kanta ezazu gurekin

lo-lelo eztia:

loa, loa, loa, loa;

ez sorginkerik,

ez begizkorik,

ez ta kalterik

gure andragana

ez bedi ondora:

gau on, ba, loa.

Armiarma ehuntzaileak ez etorri hona,

Utikan! Gorulari hankaluzeok, ken!;

Kakarraldo beltz horiek ez zaitezte hurrera,

Barakuiluak ta harrak ez kalte egin hemen.”

Udazken goibelaren ordez, udaren distira. Jainkoa eta Lege zaharraren ordez nagitasun epel eta hezea.