Nafarroa Oinez 2012ren goiburua, Kolore&hitz. Festaren errealitetea, gris anitz. Euri anitz. Esan nahi baita hodei grisak eta euria gailendu zirela atzo Zizur Txiki aldean, San Fermin Ikastolak antolaturiko jaian. Nafarroa Oinezen koordinatzaile Maider Iriartek azaldu digunez, kontuak oraindik egiteko dauzkate, baina jada ziurra da laguntza beharko dutela galerarik ez izateko eta, ahal dela, DBHko eraikina egiteko diru pixka bat lortu ahal izateko. Hori horrela, kontu korronteak zabaldu dituzte behean zehazturiko banku eta kutxetan, euskaltzaleek laguntza eman diezaieten.
Nafarroa Oinezeko antolatzaileek, halaber, eskerrak eman dizkiete bertara hurbildu ziren guztiei, egin duten esfortzuarengatik, eguraldi txarrari aurre eginez. Beren balorazioan, antolatzaileek onartu dute helburuak ez direla bete eta egun hauetan izandako euriek eragin handia izan dutela festaren emaitzan.
Atzo bertan neurri bereziak hartu behar izan ziren jendeari babesa ziurtatzeko eta aparkalekuen plana egokitzeko eta gaur, egunean zehar, bertan behera gelditu izan dira jarduera batzuk, Irrien Lagunak Klubaren kasu edo puzgarri batzuk, eta bi kontzertu.
Argazkia: nafarroaoinez.net
- Euskadiko Kutxa: 3035.0145.66.1450044110
- Caja Rural: 3008.0077.14.0703177022
- CAN: 2054.0082.10.9123939260
- Kutxa: 2101.0970.01.0012925384