Ez dakit Otegirena ondo ulertzen dudan. Baldin eta preso daraman hiru urte hauetan mota guztietako jendearekin bildu bada espetxe barruan, eta nahikoa denbora izan badu kazetari baten galderei erantzun eta liburu bat osatzeko, eta egunkarietan argitaratzen diren elkarrizketak egin ahal izan baldin baditu, orduan zergatik ezarri diote orain inkomunikazioa?
Espainiar estatua “ahul” dagoela esateagatik? Espetxeak hustu eta akordio nazionala bilatu behar dela esateagatik? Autonomiaren zikloa bukatu dela esateagatik? Euskal Herriak Eskoziaren bidetik jarraitu nahi duela esateagatik? Nik uste nuen hori guztia jada esana zuela. Beraz, zergatik? Ez da legezko alderdi baten legezko ekitaldi batean legezko gauzak esateagatik izango, ezta? Ez da politikariek, legezko gizon-emakume demokratiko horiek, Otegiri exijitzen zioten horixe, politika egitea, egiteagatik izango, ezta? Ez da Bilduren mitin batean esateagatik izango, ezta? Ez, ez da izango.