Duela urte batzuk, bizi nintzen etxeko teilatua konpondu behar izan genuen. Bitxia zen, urte gutxi batzuk lenehago berritua baitzen. Aditu bati galdetu eta argi adierazi zigun, gaizki egin zuten lehengoan eta berriz konpondu beharra zegoen.
Gauzak horrela, eztabaida bitxia izan genuen auzokideen artean. Baten ustetan, onena aurrekoan gaizki egin zutenei dei egitea zen, orduan egin ez zutena egin zezaten. Harrapatuta sentituko dira, zioen, eta ongi bideratuko digute afera. Besteon iritziz, ordea, horixe zen egin behar ez zena.
Behin engainatuta, nola deitu berriz iruzurra egin zuena? Zertarako, gauza bera berriz gertatzeko?
Eztabaida hura sarritan etorri zait gogora, krisialdia dela eta. Izan ere, krisialdia eragin zutenek nekez aterako gaituzte zulo honetatik.
Eta berriz ere oroitu dut Nafar Gobernuak administrazioa sinplifikatzeko hainbat proposamen mahai gainean jarri dituelarik. Krisialdiaz bezala, sinesten ahal dugu norengan eta egoera honetara ekarri gaituztenengan, honelako erronkei aurre egiteko?
Zuek erantzun. Nik, hasierako aferara itzuliz, esanen dizuet teilatua ongi konpondu zigutela, aurreko iruzur egileei kasu egin ez eta beste batzuengana joan ginelako.