Ez dirudi erraza. Ezinezkoa ere ematen du. Nafarroan sei mila herritarrek jasotzen dute Gizarteratze Errenta. Beste inongo laguntzarik hartzen ez duten lagunek daukate diru sarrera hau eskuratzeko eskubidea.
Batix Martiarena, Barañaingo bizilaguna, 426 eurorekin bizi da. Langabezian dago. Estu eta larri baina moldatzen da hilabete bukaerara iristeko. Bere eguneroko bizimodua kontatu digu Metropoli Forala saioan.
Eskerrak etxebizitza ordaindurik duela. Bakarrik bizi da eta horrek ere laguntzen du gastuak neurtzerako orduan. Bere esanetan, beste hainbat larriago bizi dira, besteak beste seme alabak dituzten familiak edo gurasoak hain kargura dituzten herritarrak.