Euskara sustatzeko ituna sinatu dute Eusko Jaurlaritzak eta Nafarroako Gobernuak: helduen irakaskuntzan, hizkuntz azterketetan, ikerketan eta itzulpenetan arituko dira elkarlanean bi gobernuak, besteak beste. "Ahalmen ekonomikoen arabera" garatuko dituzte egitasmoak. Itunean behin baino gehiagotan ohartarazi dute EAE eta Nafarroa bi egitura diferente direla. Azaldu dutenez, duela hiru urte bi gobernuek sinatu zuten lankidetza protokolo orokorraren ildotik dator gaurko hitzarmena.
