Azken hilabeteotako pelikula ilun honetatik ateratzeko modu ederra da zinemara joatea, bestelako istorioen bila, edo istorio berdintsuak, baina ikuspegi ezberdinetik eskainiak.
Badugu bestelako mundu bat posible dela amesteko behar handia, bestela nekez aterako baikara etsipenetik.
Azken bolada honetan. Frantziar zineak aukera bikoitz eta bikaina eskaini digu horretarako Le Havre eta Las Nieves del Klimanjaro filmetan. Ongi eginak biak, atseginak eta amaiera ederra dutenak, ederregia egia izateko. Baina, esan bezala, gizarteak amesteko beharra dauka. Helduok eta, batez ere, atzean datozen gazteek.
Diferenteak izanagatik, mezu berdintsua dutela iruditzen zait, biek duintasuna eta elkartasunaren aldarrikapena baitute oinarritzat. Mundua mundu denetik, gaurkotasunik galdu ez duen mezua. Gaur eta hemen ere, mezu hori inoiz baino gehiago azpimarratu behar dugula iruditzen zait.
