Euskararen festak izan dira asteburuan. Jende ugari, kolore ugari… horixe gaurko argazki zenbaitetan. Bizkaiko Trapagaranen izan da Bizkaiko euskal eskola pribatuen festa: Bizkaiko ikastolen Ibilaldia. Gipuzkoako Larraulen izan da Eskola Txikien festa, eskola publiko txikien festa.
Egin zaizkion kritika batzuk direla eta, honela dio sailburuak: “Esaten badugu D ereduak ez duela balio euskalduntzeko, baztertu egin beharko genuke”. Atentzioa eman didate sailburuaren hitzek.
Egia izan daiteke euskara hutsezko D ereduak ez duela haurra euskalduntzen. Baina, matizatu beharra dago hori, zeren bestela, gezurretan ari gara. Eskola batzuetan, D ereduak ez du euskalduntzen; beste batzuetan, erdipurdiko emaitzak ematen ditu; eta lekuren batzuetan, arrakastatsua da.
Hartara, euskara hutsezko eskola-ereduak behar duena da kudeaketa egokia, azterketa zehatza eskolaz eskola, bertako irakaskuntzaren kalitatearen jarraipen teknikoa, eta irakasleentzako prestakuntza egokia. Bestea, euskara hutsezko eredua erabat baztertzeko aukera aipatzea, joko maltzurra da: falazia argumentatibo bat, mehatxu merkea.