Eskaintzak badu eraginik eskarian. Iruñeko Udalak eta Nafarroako Gobernuak berriki argitaratu dituzten haur eskoletako aurrematrikulazio datuek horixe erakutsi dute. Izan ere, iaz Mendebaldea auzoan euskarazko eskaerarik ez erregistratzetik, 2025ean % 42,41era igaro da.
Administrazioan Euskaraz Taldeak (AET) aztertu ditu Nafarroako hiriburuko aurrematrikulazioen datuak, eta bere diagnostikoaren arabera, bilakaera horrek erakusten du euskarazko eskaintzarik ez izateak ezkutatu egiten duela benetako eskaria, eta hori txertatzeak, berriz, agerian uzten duela familiek hezkuntza-eredu horrekiko duten interesa. Hori dela eta, Iruñeak euskarazko haur-eskola gehiago behar dituela ondorioztatu du AET kolektiboak, "Iruñeko Udalaren haur eskoletan eskaeren erdiak baino gehiago plazarik gabe geratu ziren". Gainera, euskarazko eskaintza zabaltzeak hizkuntza-oreka eta aukera-berdintasuna lortzen laguntzen duela defendatu dute.
Haur eskoletako aurrematrikula kanpainan %19,18tik %25,16ra igo da euskarazko eskaria Iruñean, ia sei puntu gehiago alegia. Kopuru absolutuetan, iaz euskarazko eskaerak 339 izatetik, aurten 691 izatera igaro dira.
Haur eskoletako aurrematrikula kanpainan %19,18tik %25,16ra igo da euskarazko eskaria Iruñean, hau da, ia sei puntu gehiago alegia. Kopuru absolutuetan, iaz euskarazko eskaerak 339 izatetik, aurten 691 izatera igaro dira. Auzoka, euskarazko eskari handienak Txantrean (%52,76), Arrosadian (%47,73), Buztintxurin (%43,90), Mendebaldean (%42,41), Alde Zaharrean (%38,54), Lezkairun (%37,14), Sanduzelain (%35,37) eta Arrotxapean (%25,35) erregistratu dira. Halaber, euskarazko eskaintzarik ez da Azpilagaña, Donibane, Mendillorri, Etxabakoitz eta Bigarren Zabalguneko auzoetan.
Horrekin batera, murgiltze ereduko eskola gehiago irekitzearen beharra nabarmendu du AETk, Txantreako Izartegi haur eskola baita Iruñean den bakarra. Azaldu dutenez, "euskara ez da gaur kaleko hizkuntza nagusia Iruñean. Horrexegatik, beharrezkoa da euskararen irakaskuntza baldintza egokietan eskaintzea. Eredu mistoek euskarazko eskaera badagoela erakutsi dute. Baina murgiltze ereduak erakutsia du eredurik eraginkorrena dela euskara barneratzeko". Eredu hori hedatzea posible izanen litzatekeela uste dute AETko kideek, Iruñeko Udalean eta Nafarroako Gobernuan, "borondate politikorik balego".