Armiarmak argitaratutako kritikak dioen bezala, izenburuak autolaguntza liburu batena eman lezakeen arren Ereinek narratiba sailean argitaratu duen western itxurako testua da. Mariana Travaciok idatzi du Barkamena existituko balitz bezala eta Fernando Reyk itzuli du. Lehenengo aldia da Mariana Travacioren lana euskaraz irakurtzerik dagoela.
Ostegunean, arratsaldeko 19:30ean, Zaldiko Maldikoko irakurle taldean izango dute eleberria aztergai. Fernando Rey itzultzaileak parte hartuko du saioan.
Gorroto trinkotuei eta haiekin loturiko mendekuei buruzko istorio bat da, western paisaien unibertso batean gertatzen dena, lur mortuetan aditzen diren pauso-hotsak inguruan. Kontakizunaren tramak mantso egiten du aurrera eta gauza askotarako denbora uzten du: lurraz gozatzeko, eguzki kiskalgarriaren pean ipar-haizearen bultzada eta izerdi-tanten jarioa sentitzeko. Kontakizunaren hasieratik susmatzen dugu tragedia hurbil dela, nahiz eta ezin dugun jakin nolakoa, zenbaterainokoa. Eta aurrera goaz, dena lehertzen den arte.
