Hotz boladan, Iruñean zero gradutik beherako tenperatura egiten duen honetan, kalean lo egiten duten ehun pertsona baino gehiagorentzat Jose eta Maria aterpetxea irekitzea eskatu dute Pertsona Migratuen Informazio Guneko kideek. 'Kalea ez da etxea' lelopean protesta egin zuten atzo arratsaldean eraikinaren atarian eta bi pertsona aterpetxean sartu ziren, modu baketsuan, lo zakuekin atarian etzan ziren.
Antolatzaileek salatu dutenez, “Nafarroako Gobernuak eta Iruñeko Udalak ez dituzte aktibatu haiek hartzeko larrialdiko baliabideak”, eta ondorioz, elkarretaratzea egin zuten atzo.
Iazko abenduan Udalak giza laguntzako protokolo espezifiko bat onartu zuen hirian urtebete baino gutxiago daramaten etxerik gabeko pertsonei hotz-boladak irauten duen bitartean arreta emateko. Eta egunotan, aktibatzeko baldintzak beteta neurriak ezarri ez izana salatu du kolektiboak.
