Iruñeko Udalak duela hemeretzi urte blokeatuta eta eraiki gabe diren bi orubeen egoerari heltzea erabaki du. 2006an Grupo Palo Alto enpresak bi lursail eskuratu zituen Arrotxapean, Anelier pasealekuan eta Arga Ibaia kaleetan, etxebizitzak eraikitzeko eta geroztik, proiektua geldirik dago.
Udalak hilabeteko epea eman dio enpresari proiektua berrabiarazteko eta behingoz, etxebizitzak eraiki ditzan; ez badu egiten, Udalak hartuko du beregain proiektuaren zuzendaritza eta beharrezkoa balitz, berriro enkantean jarriko dira. Joxe Abaurrea Iruñeko zinegotziak gaineratu duenez, "egungo jabearekin edo beste enpresa batekin, helburua da ahalik eta epe laburrenean etxebizitzak herritarren esku egotea”.
Behin udalak urratsa emanda, proiektuari izaera sozialagoa emango zaio. Horrela, eraikiko diren 175 etxebizitzak babestuak izango dira. Aurten, 2025ean garatu nahi du espedientea eta lizitazioa Iruñeko Udalak, 2026an obrak hasi eta 2027rako, etxebizitza hauek herritarrendako prest izatea espero du gobernu taldeak.
