Katakrak argitaletxeak Annie Ernauxek literaturaren, gizartearen eta idazketaren inguruan egindako gogoetak biltzen dituen 'Idazketa labana bat da' euskaraz plazaratu du, Leire Lakastak itzulita.
Urtebetez, 2001 eta 2002an, Frédéric-Yves Jeannet idazleak gogoetak eta galderak bidali zizkion Annie Ernauxi. Erantzunetan, Ernauxek, literaturaz, gizarteaz eta idazketaz egin zuen gogoeta: zergatik idazten duen idazten duenaz, zergatik idazten duen idazten duen bezala.
Eider Rodriguezek idatzi du hitzaurrea eta halaxe dio: “Desioak gidaturiko idazketa bat da berea. Eta irakurlearentzat zaila da hain basatiki desio duen idazlearen lorratzari ez lotzea”.
Bide beretik, Leire Lakastak “Ernauxek lanabes bezala hartzen du literatura, sorkuntza orokorrean", argitu du. "Idazketa labana bat da hain zuzen balio dezakeelako sistema bera arrakalatzeko”, azaldu du.
