Euskalerria Irratiak programazio berezia izango du sanferminetan, jaietako zuziria piztu aurretik bertatik bertara hasiko da txupinazoaren kontakizuna, Seminario Etxeko balkoitik 10:00etatik 12:30era, Juan Kruz Lakasta eta Reyes Ilintxetaren eskutik. Honekin batera, aparteko solasaldiak Alde Zaharrean zehar, Miren Mindegiaren eskutik. Esaterako, Dugunako lagunen hamaiketakora gerturatuko gara, aurtengo txupinazoaren jaurtitzaileekin solasteko. Gainera, Haritz Pascual eta Pello Argiñarena udaletxean zehar ibiliko dira zinegotzi, alkate eta gonbidatu ezberdinekin solasean.
Horretaz gain, uztailaren 7tik 12ra bitartean, Iruñeko Zaldi Zuritik zuzen zuzenean Sanfermintza saioa, goizeko 12:00etatik 14:00etara. Askotariko gonbidatuak izango ditugu, politikariak, kirolariak, abeslariak, baita, zenbait eragile ere. Hots, Maider Beloki, Iosu Txueka, Mikel Idoate, Joseba Asiron edo Hofe izango dira horietako batzuk.
Guzti honekin batera, kale konexio ezberdinak egingo dira egunero Iruñeko hainbat bazterretatik, baita entzierroaren kronika ere. Guztia, noski, sareetan eta webgunean etengabeko eguneratze batekin batera.
