Lizarrako Frai Diegoren erretratua da erakusketako pieza nagusietako bat. XX. mendearen lehen erdialdeko Nafarroako pinturaren naturalismoaren erakusle nagusietakoa izan zen Ziga. Erakusketa honek izenak adierazi bezala, figurazioa eta esentzia kontzeptuei buruzko hausnarketa iradokitzen du, horiek baitira bere obraren definitzaileak.
Gainera, Gustavo de Maeztu eta Javier Ziga margolariek, garai eta unibertso piktoriko bera partekatu zuten eta erakusketa bi margolarien topaketa da. Beraz bi artisten obra ikusteko parada eskainiko du Gustavo de Maeztu museoak.
Erakusketak berrogeita bat margolan ditu eta bost ardatz tematikoren inguruan antolatuta dago. Lehena, akademiaren marrazkiak (San Fernandoko Arte Ederren Errege Akademia) eta Errealismo Sozialak osatzen dute, eta Madrilgo etapa (1909-1911) biltzen du atal honek. Bigarrenean, Parisko paisaiak (1912-1914) aurkituko ditugu. Hirugarrenean, erretratuak eta laugarrenean bestelako paisaiak. Azkenik, Zigaren pintura etnografikoa da erakusketaren bosgarren ardatza.