Bigarren saiakera da Iruñean bizikleta gaineko poliziak ezartzeko. 2015eko legegintzaldian egin zen lehen saiakera baina 2019an UPN poterera iristearekin bertan behera geratu zen. Udalean aldaketa gauzatuta berreskuratu da zerbitzua, gertutasun polizia zabaltze aldera. “Uste dugu ordenantzak betetze aldera oso tresna erabilgarria izanen dela talde hau” azaldu du Endika Alonso, hiri segurtasunerako zinegotziak; “Espazio publikoaren erabileran auto, bizikleta, patinete eta oinezkoen artean gertatzen diren tirabiretan eragitea espero dugu”. Uztailaren 6 eta 7an kenduta, sanferminetan ere mantenduko da zerbitzua.
Bizikleta gaineko udaltzain talde berriak gaur abiatuko ditu bere zerbitzuak, Donibane, Iturrama, Mendebaldea-Ermitagaña, Etxabakoitz, Sanduzelai, Buztintxuri, Arrotxapea eta Txantrean. “Bidegorriak eta parkeak zainduko dituzte, hiritarrei behar duten informazioa eta ohartarazpenak ematen”. Unitatea osatuko duten 9 poliziek, aurreko saiakeran erabili ziren bizikleta berberak izanen dituzte. “Reciclo programaren bitartez, bizikletak konpondu eta prest utzi ditugu” azaldu du Alonsok, “Gizarte gaietarako arloarekin elkarlanean, tailer sozialetan, bizikleta hauek konpontzen lagundu gaituzte”.
