Isilarazia eta ezkutatua izan den emakumeen historia berreskuratzea eta ezagutaraztea du helburu abiatu berri den Memoria Eszenikoa taldeak, maiatza bukaeratik aurrera Iruñean eginen dituen antzeztutako bisita gidatuen bitartez. Garazi San Martin, Maria Araiz, Carla Ruiz eta Maia Ansak osatzen dute aktore taldea eta Alicia Otaegi da zuzendari artistikoa. Ansak berak argitu moduan, Ana Diez de Ure historialariaren aholkularitzarekin eta berak hauspotuta abiatu zen ekimena, duela hilabete batzuk.
Emakumeen historia berreskuratzeko dokumentazio lanaren ondoren, datorren astean Nafarroako Antzerki Eskolan burutuko duten egonaldi artistikoan borobilduko dute proiektua. "Asmoa, emakumeen historia kalean bertan antzeztea da, ikuspegi feminista batetik eta isildutako ahots horiek erdigunean jarriz, kalean bertan, gauzak gertatu diren lekuetan". Diez de Urek egindako lanetik abiatuta, urrats bat gehiago eman eta antzerki formatua izanen duen bisita gidatua sortuko dute. "Proiektua ez da itxia izango, etorkizunean hazi daiteke, aktore taldea handituz edo proiektua beste lekuetara edo antzoki formatura eramanez".
