Helduen arteko hizkuntza-praktikak aldatzeko eta euskara gehiago erabiltzeko aktibazio ekimena antolatu du Euskaltzaleen Topaguneak. Haurren aurrean, helduok heldu ekimenari hasiera eman diote gaur Iruñean egindako jardunaldiekin. Goizean hitzaldiak izan dira Kondestable Jauregian, Gemma Sangines, Rosa Ramos eta Paula Kasaresekin, eta arratsaldean, Kike Amonarrizen txanda izango da.
Helduon eredugarritasuna hizkuntza sozializazioaren prozesuan izango du mintzagai Amonarrizek. Izan ere, guraso euskaldunak eta euskararen erabilera "akuilu eta motor" dira. Arratsaldeko 18:00etatik 19:00etara Laba aretoan izango da saioa. Laburrean, gurasoei euskararen erabileran aurrerapausoak emateko nola eta zertan lagundu dezaketen azalduko die Amonarrizek.