Auto bidaiak bertso saioetara bidean. Zorizko aliantzak eta adiskidetasunak. Oholtzapekoak. Oholtza gainekoak. Botere hartzeak, garagardoak eta konpresak. Bertsolaritzaren munduan murgilduta bizi diren emakumeak jendaurrera jauzi egitean bizi dituzten pozak, alegia.
Guzti hori islatzen du ARGIA-k argitaratu berri duen Ño! komikiak. Liburuak hamar eszena irudikatzen ditu, betiere bertsolaritzaren munduari begiratzen dioten eszenak. Maitane Gartziandiak sortu ditu irudiak eta Miren Artetxe eta Eli Pagola bertsolariek, testuak. Pagolak argitu moduan, "bertsolaritzaren munduan aurkitzen ditugun gorputz desberdinak islatu nahi izan ditugu komikian. Guri eta gure ingurukoei gertatu zaizkigun istorioak eta egoerak hamar eszena laburretan irudikatu ditugu".
