Lau unibertso fantastiko izanen ditu Brif Braf Bruf jaialdiak Txantrea auzoan. Hirugarrenez, haurrak sormen lanetan jarri dituzte antolatzaileek edizioa prestatzeko. Hori baita jaialdiaren bereizgarria.
Arriurdiñeta plazan Hiri fantastikoa izango da, ipuinak entzuteko telefono kabina bat ezarriko dute, baita zebra bide bat zeharkatzeko argibide zoroak emanen dituen semaforo bat ere. Baso fantastikoa Munduaren parkean sortuko dute, izaki mitologikoak eta mezu sekretuak postontzi fantastikoetan ezkutatuta izanen dira bertan. Euskararen plazan, berriz, Azoka fantastikoa eginen dute. Pareta fantastikoak ere izanen dira Txantrean. Maite Mutuberria ilustratzaileak Galdera asko ipuinean oinarritutako mural bat margotuko du Magdalena kaleko 6. zenbakian, Bernart Etxepare IPren 1. mailako txikien laguntzarekin.