1936ko uztailaren 19an Iruñean kolpe militarra irabazi ondoren, sekulako indarkeria piztu zen sektore disidente guztien aurka, eta horren adierazpen nagusietako bat oposizioko milaka pertsona atxilotu eta espetxeratzea izan zen. Nafarroako Memoriaren Institutuak Nafarroako Memoria Historikoaren Dokumentu Funtsari eskatutako txostenak ez du zalantzarik uzten errepresioaren dimentsioari buruz.
Zezen plazaren aurrean hiriko bost gatibu etxeak gogoratzen ditu monolitoak. Gaztelugibelean dago, berriz, fusilatutako bizilagunak omentzeko plaka. Iruñeko Udalak jarri zituen 2012ko martxoan, Nafarroako Fusilatuen Senitartekoen Elkarteak sustatuta. Larragako Memoriaren alde eskulturarekin batera memoria leku dira orain.
Ana Ollo herritarrekiko harremanetarako kontseilariak eman du gaur erabakiaren berri. Gehiago izanen diren galdetu diote kazetariek, agerraldian, Espainiako Poliziaren komisaldegi zaharra eta Guardia Zibilaren kuartela memoria gune izatea eskatu du-eta Egia Osoa ekimenak. "Komunikabideen bitartez ezagutu dugu eskaera, ez dugu halakorik jaso gobernuan", azaldu du. Jasotzen dutenean, prozedura martxan jarriko dutela azaldu du, "memoria leku izan daitezkeen edo ez erabakitzeko".
Izendatu berri dituzten hiru horiekin, guztira 20 memoria leku daude Nafarroan.
