Sentimenduetan, beldurretan eta intimitatean murgiltzea proposatuko du Antzerki Aroa euskarazko antzerki gazte eta helduaren udazkeneko zikloak. Bi aste barru hasiko da, eta nafar artisten lanak bilduko ditu Antzerki Eskolak.
Oier Zuñigak irekiko du zikloa, Eresia lanarekin, urriaren 19an. Haren amaren heriotzari tiraka doluaz mintzo den obra ondu du iruindarrak. Azaroaren 2an Lore More Konpainiaren txanda izango da eta Trapu zikinak eskainiko dute eszenatokian. Zikloa Boga Boga Konapiniak itxiko du, azaroaren 23an Behi Jasa antzezlana taularatuz. Tratu txarren gaia poesiatik jorratuko dute.
Antzokitik, ikasgelara
Aurrenekoz Hezkuntza departamentuko euskarazko sailak parte hartuko du Iruñeko Udalarekin batera zikloan. Euskarazko hezkuntzako D ereduko ikasleekin landuko dituzte obrak. Mendillorri, Zizur, Lekarotz, Alaitz, Leitza, Iturrama, Eunate eta Sarrigurengo batxilergoko lehen mailako 530 ikaslek baino gehiagok parte hartuko dute.