Elkarte, zuzendaritza, txarangetan…gizonezkoak nagusi dira Iruñeko Peñetan. Horrela baieztatu du 16 peñetan egindako barne inkestak. Galdetegiaren datuak eskutan hartuta, txostena egin du Iruñeko Peñen Federazioko talde feministak. “Egungo egoeraren analisitik, etorkizunezko peña berdinzaleetaraino joaten den dokumentua sortu dugu” azaldu du taldeko kidea den Rakel Arjolek. “Duela 30-40 urte hasi ziren emakumeak peñetan sartzen eta egun guztietako bazkide izan gaitezke” esan du Euskalerria Irratian, “Baina oraindik ere gure presentzia txikia da eta hori somatzen da. Peñak oraindik esparru maskulinizatuak dira, jarrera zenbait oso gizonezkoak dira eta horrek emakumezko bazkide berriak erakartzeko arazoa suposatzen du”.
Egoerari buelta eman nahi dio Peñen Federazioak eta horretarako hainbat neurri planteatu dituzte, neska eta emakume bazkideen kopurua biderkatzeko. “Peñetan sartzeko prozeduran emakumeoi erraztasunak eman, zuzendaritzetan emakume gehiago sartu, jardueretan genero ikuspegia kontutan hartu eta landu eta gure eguneroko hizkuntzan eta komunikazioan, genero ikuspegia ere erabili” zehaztu du irratian Arjolek.
2022ko Sanferminak
Aurtengo Sanferminetan, berdintasuna izanen da oinarri 16 peñetan. Bideoa prestatu dute, onartuko ez diren jarrera sexista, matxista eta babosoak salatzeko.
