53 greba eguna dute 0-3 zikloko langileek, eta protesta ekintzak gogortu dituzte azken orduotan. Nafarroako Parlamentuko osoko bilkurarekin bat eginez, ostegunero bezala, ganberaren atarian bildu dira goizean goiz protesta egiteko. Gaur, baina, errepidean eseri eta trafikoa moztu dute langileek. Minutu gutxiko protesta izan da, Foruzaingoak altxarazi ditu. Errepidea irekita dago orain.
Udalen federaziora "sinbolikoki" kateatu ziren atzo
Eider Garde 0-3 Plataformako bozeramaileak kritikatu duenez, gobernua ez da errespetatzen ari Hezkuntza Departamentuaren eta Nafarroako Udal eta Kontzejuen Federazioaren artean sortutako negoziazio-organoaren egutegia; izan ere, plataforma bertan da gonbidatu gisa, eta "aitzakiak" aipatu dituzte asteazken honetarako aurreikusitako bileran. Soilik langileak agertu ziren atzo hitzordura.
Gardek esan du ez duela ulertzen "zer azterketa sakon egiten ari diren edo zertan oinarritzen ari diren", oraindik ez dakitelako zer jakinarazi behar zien plataformak saioan. "Gure ustez, bat gehiago ez egitea da, eta agerian uzten du mahai hau ez dela eraginkorra gatazka konpontzeko", amaitu du.