Talde zabala da Laba gunekoa, kopuruz zein izaeraz. Euskararekin eta euskal kulturarekin beste proiektu batzuetan parte hartzen dute askok, euskalgintzaren egituretatik aparte zeuden beste asko; gazteek, beteranoek.. denek dute lekua Laban. Eta gehiago izan nahi dute. Labazkidetu kanpaina abiatu berri dute, proiektuaren oinarria sendotzeko.
Urtean 120€ ordainduko dute bazkideek, eta ekarpena errentaren aitorpenean %80a desgrabatzeko aukera izanen dute. Bazkideek urteko batzar orokorrean parte hartuko dute, barne informazioa jasoko dute eta aukera izanen dute erabakietan parte hartzeko. Gainera, Labak antolatutako jardueretan abantailak izanen dituzte. Laba.eus atarian egin daiteke bazkidetza.
Egitarau oparoa osatzen ari dira hiriko bihotzean. Datorren astean sexualitatearen inguruko zirrikituak arakatuko dituzte eta gaur Euskalerria Irratiarekin elkarlanean Ongi egiten dugu Iruñekoak izateko podcastaren grabazioa eginen dute, 19:30ean.