Ezohiko batzarra egin dute Erriberako hiriburuan, gaur goizean. Aho batez gaitzetsi du Tuterako udalbatzak hilketa. Eguerdian elkarretaratzea egin dute udaletxearen aurrean, eta arratsaldean foruen plazan eginen dute. Erriberako M8 plataformak antolatuta, ehunka lagun bildu ziren atzo ere Tuterako Foruen plazan. Hiru eguneko dolua agindu dute. Baita Cortesen ere. Cortesko Udalak ezohiko batzarra atzo arratsaldean egin zuen.
Gaur, beste herri batzuetan ere deitu dituzte hilketa gaitzesteko elkarretaratzeak. Euskal Herriko Emakumeon Mundu Martxak deituta, Iruñean, 20:00etan eginen dute protesta, Udaletxe plazan.
Astelehen goizean aurkitu zuten 38 urteko emakumearen gorpua Foruzaingoak eta suhiltzaileek Tuteran. Senarra da susmagarri nagusia. 41 urte ditu, eta atzo atxilotu zuten Bordeletik gertuko Okzitaniako herri batean. Urtarrilaren 8tik 9ra bitartean, larunbatetik iganderako gauean, "hainbat labankadaz" eraso egin ziolakoan atxilotu dute. Tuterako emakumearen aurkako indarkerian espezializatutako organoak du auzia bere gain. Emakumearen aurkako indarkeriatzat hartu zuen atzo jazoera Nafarroako Gobernuak.
2022an Nafarroan hil duten lehenengo emakumea da Sara Pina. Egiturazko indarkeria da emakumeen aurkakoa. 2003. urtetik, 20 dira eraildakoak, Nafarroan.
016
Biktima izan direnen emakumeentzako arreta zerbitzuko telefonoa
Fakturan ez du arrastorik uzten, baina telefonoaren dei erregistroetatik ezabatu behar da.