Uda arraro honetan aurrera darrai UEUren 48. Edizioak. Aurten ez ohiko datetan eta segurtasun neurri guztiak hartuta bi alditan bildu dituzte ikastaroak: lehena uztailean izan zen, orduan Eibar, Donostia eta Usurbilen egin ziren saioak eta orain Iruñea eta Baionaren txanda dator.
Iruñean lau ikastaro eskainiko dira abuztuaren 31an eta irailaren 1ean, Ezpeleta jauregian eta modu presentzialean, Idoia Torregarai UEUko komunikazio arduradunak azaldu digun bezala.
Eta arrakastatsu suertatu dira: lau ikastaroetatik bakar batean gelditen dira oraindik plaza libreak: Euskal Herria Dekoloniala Mintegia.
Beste hirurak beteak daude: Orreagatik 36ko gerrara Nafarroaren historia ikastaroa, Erabilera lagapeneko Etxebizitza Kooperatiben eredua: aukerak eta esperientziak eta Visual Thinking ikas-irakasteko ikusgarria.
Lau ikastaro hauetaz gain UEUk aurten beste 11 gehiago eskainiko ditu Nafarroako Gobernuko Unibertsitateko, Berrikuntzako eta Eraldaketa Digitaleko atalarekin sinatutako hitzarmena dela medio.
Hauek abuztuaren 31tik aurrera eginen dira, batzuk modu presentzialean eta besteak on-line eta denak, jada, beteak daude.