Iruñeko Udaleko lantegietan 1.750 maskara josten ari dira udal langileentzat

Langile bat, josi duen maskara erakusten. (Argazkia: Iruñeko Udala)

Arnas jariakinen aurreko lehen hesi hori egiteko tutorial bat ere prestatu dute. 

Iruñeko Udaleko jantzigintzako eta tapizgintzako lantegietako partaideak maskarak egiten ari dira udaleko tailerretan. 70 metro oihalekin 1.750 maskara berrerabilgarri egitea aurreikusten dute. Gizarte Zerbitzuetako edo beste udal arlo batzuetako langileentzat erabiliko dituzte, edo behar dituzten udal apartamentu tutelatuetako egoiliarrentzat. Oraingoz ez dira maskara profesionalak osasunaren ikuspegitik, baina lehen hesi gisa balio dute arnas jariakinen aurrean. Maskarak prest daude karbono-iragazkiak sartzeko horiek eskuragarri daudenean, eta horrek babes maila handituko luke.

Jantzigintzako peoi batek eta zerbitzu horretako arduradunak, tapizeriako beste bi peoirekin batera, oihala moztuko dute, eusteko gomak jostuko dizkiote eta piezak poliesterrez egindako "bies zintekin" amaituko dituzte. Ondoren, Iruñeko Udaleko Desinfekzio Parkea arduratuko da maskarak garbitzeaz eta lehortzeaz, eta tailerrera itzuliko ditu. Handik, maskarak behar dituzten udal-eremuetara bidaliko dituzte. Unitate bakoitzak erabiltzeko jarraibideak izango ditu. Prozedura hori guztia Iruñeko Udaleko Lan Arriskuen Prebentziorako Zerbitzuak koordinatu du.

Bideo bat, argibideekin

Masakak josteko prozesua bideo batean grabatu dute, tutorial digital gisa, eta Edurne Sanchez Ruiz da protagonista, jantzigintzako lantegiaren arduraduna. Gaur goizetik, argibidedun ikus-entzunezkoa ikusgai dago Interneten. Maskara bakoitzerako, 32x18 zentimetroko oihala eta 42x50 zentimetroko goma bat behar da. Udal lantegian josteko makina industrialak erabiltzen badira ere, josteko makina arruntekin ere egin daiteke, baita eskuz ere.

Maskara horiek hasierako hesi gisa balioko lukete arnas jariakinen aurrean, eta berrerabil daitezke, baldin eta garbiketan 60 gradutara iristen bada, eta lixibarekin. Jarri eta kentzeko orduan, neurri guztiak hartu behar dira oihala ez ukitzeko, eta eskuak ondo garbitu edo desinfektatu behar dira, aurretik eta ondoren.

Udalak ez du baztertzen orain itxita dauden ehungintzako hornitzaile edo dendekin harremanetan jartzea, horiek ekimenean lagundu baitezakete.