Hilaren 9ko bukaera-egun handia aurkezteko prentsa-agerraldia egin
dute gaur AEK eta KORRIKAren arduradunek. Haiekin batera, Reyes
Ilintxeta kazetaria izan da, bukaerako ekitaldi nagusiaren aurkezlea.
Asier Amondok, KORRIKAren arduradunak, nabarmendu du Iruñea
dela KORRIKAren bukaera gehien ezagutu dituen hiriburua, eta
AEKrentzat sekulako pizgarria dela 20. edizioa Nafarroako hiriburuan
amaitzea. Iruñean nahiz Nafarroan eman den aldaketa instituzionalak
urte beltzen aroaren amaiera ekarri duelako. Une ezin hobean dator
herri honek duen ekimen zirraragarrienaren 20. aldia.
12:30ean lekukoari ongi etorria eginen zaio Foruen Monumentuaren
ondoan izanen den ekitaldian. Hona iritsi baino lehen 20. Korrikak
Iruñerrian ibilbide luzea eginen dueta honekin
batera azken kilometroetan nortzuk izanen diren jakinarazi da: 2546
Gehiengo sindikala; 2547 Alderdi politikoak; 2548 Etxerat: 2549
Udalbiltza; 2550 Gure Esku dago; 2551 Berria; 2552 UEMA; 2553
Euskaltzaindia; 2554 EHIGE; 2555 Ikastolen Elkartea; 2556
Kontseilua; 2557 AEK.
Egun osoko jaia
Era berean, Arantxa Ilarregik, azken eguneko arduradunak, azaldu du
egun osorako prest dagoen egitaraua. Igandean, gainera, eguraldiak
lagunduko du, eta, beraz, 20. KORRIKAk bukaera itzela izanen du.
Horretarako hiru gune nagusi izanen dira: Labrit, non bertso bazkaria
eta Dantzarorekin dantzaldia izanen den; Baratxurien plaza eta
Aduanako txokoa familen gunean izanen da. Bertan sukaldea eta
taloak izateaz gain, tailerrak, gaztelu puzgarriak, edoskitze gunea eta
taula gaineko hainbat ekitaldi izanen ditugu; Antoniuttin kontzertuak
izanen dira. Honekin guztiarekin San Frantzisko plazan Errigora azoka
muntatuko da eta San Nikolas plazan Artisau azoka izanen da.
