Nafarroako Ospitale Guneko Larrialdi zerbitzuetako laguntzaile, erizain eta jagoleek agerraldia egin dute gaur goizean, baldintza “duinak” galdegiteko; izan ere, larrialdiak zabaldu zirenetik, “jasanezina” da egoera, eta “konpondu beharrekoak okerrera egiten du, egunez egun”.
Lan egiteko baldintza “kaxkarrak”, “antolakuntza eza” eta “zerbitzuaren beharrei erantzuten ez dien buruzagitza” dituztela salatu dute, baita zerbitzuaren arduradunek “borondaterik” ez dutela egoerari buelta emateko.
Askoratiko arazoei egin behar diete aurre larrialdi zerbitzuko laguntzaile, erizain zein jagoleek: espazio faltari, ohe eta aulki "eskasiari", beharren aurrikuspen "txarrari", "motibazio faltari"… egungo langile kopuruak, gainera, "ezin dio aurre egin zerbitzuaren beharrei", idazki baten bitartez langileek salatu dutenez.
Horregatik, langileak prekaritate egoeran daudela kritikatuta, eskari argiak egin dituzte: “egoki” banatutako espazioa; lan baldintza “duinak”; lan egiteko materiala; “zerbitzuaren kalitatea bermatuko duen langile kopuru egonkorra”; etengabeko formakuntza; eta, “batez ere, liderrak izanen diren kudeatzaileak, zerbitzua koordinatuko dutenak, berriz ebaluatuko dutenak eta kalitatezko talde lanaren alde borrokatuko direnak”.