"Gertukoa, auzotako lanean oinarritua, mugimendu asoziatiboarekin bat joanen dena eta emakumearen babesa zein bizikletaren erabilpena sustatuko duena". Halakoxea izanen da hemendik aurrera Iruñeko Udaltzaingoa, Aritz Romeo Herritarren Sertasunerako zinegotziak adierazi duenez. Eta, oinarrian, "prebentzioa", aldez aurreko lana izanen baitu ardatz.
Iruñeko Udaltzaingoaren Zuzendaritza Planaren barruan bildutako ezaugarriak dira aipatutako guztiak, izan ere, “komunitatearen polizia” da sortu nahi dutena. Hala, kalean egonen da langileen%55-60 inguru eta auzo bakoitzean udaltzain bat izanen da.
Herritarren segurtasuna "errespetuan eta oinarrizko eskubideen defentsaren testuinguruan" ulertzen duela eta "oinarrizko eskubideak bermatzeko erraminta" dela azaldu du Aritz Romeo Herritarren segurtasunerako zinegotziak, proposatutakoa "erantzunkidetasun modeloa" dela gaineratuta.
Genero indarkeria eta homofobiaren kontrako taldea
Berrikuntzak dakartza Iruñeko Udalzaingoa eraldatzeko planak: genero indarkeriaren eta jarrera homofoboen kontrako taldea egonen da, baita herritarren arretararako unitatea ere. Horrez gainera, Biktimen Arretarako Bulegoa "indartuta" aterako da.
Barne eta kanpo lana
Jarraituko dituzten ildoak, bost. Lehenik eta behin, udaltzainen eta herritarren arteko erlazioak jorratuko dituzte; bigarrenik, poliziaren barneko lan harremanak; hirugarrenik, langileria beraren profila; laugarrenik, bizikidetza eta bitartekaritza muinean egotea; eta, bosgarrenik, eta, azkenik, berrikuntza eta teknologia berriak txertatzea.
Aurten hasi, eta 2021ean amaituko da Iruñeko Udaltzaingoaren Zuzendaritza Plana, eta, bost urteotan, epeka txertatuko dituzte berrikuntzak.