“Auzo-eztabaidaguneak elkarrizketa-guneak dira, herritarrek beren proposamenak egin ditzaten, auzoko zinegotziengandik eta Udaletik informazioa jaso dezaten, eta haiei kontsultak eta ekarpenak egin diezazkieten. Hartara, aukera ematen zaie herritarrei udala osatzen duten auzoen kudeaketan era malguago eta irekiagoan parte hartzeko. Udalak proiektu bat sustatuko du Iruñeko auzo bakoitzean partaidetzazko gune horietakoren bat arautzeko, horien bidez herritarrak udal-erabakietan inplikatu daitezen” . Horiexek dira auzo-eztabaidaguneak, Iruñeko Udalaren hitzetan. Iazko ikasturtean jarri zituen martxan eta aurtengoan ere hauspoa eman nahi izan die. Gaur izanen da lehenbizikoa, Arrosadiako Civivoxean, Arrosadiako eta Azpilagañako herritarrekin; haiekin batera izanen da Edurne Egino zinegotzia.
2017 urteko lehen hiruhileko honetan, hamahiru auzo-eztabaidagune eginen dituzte. Urtarrileko, otsaileko eta martxoko astearte guztietan izanen dira. Urte osoan izanen dira, gainera, eta hala, 35 saioetara joateko aukera edukiko dute auzokideek.
Bilerotan, herritarren proposamenak jasoko dira. Halaber, auzoei buruzko auzi garrantzitsu eta premiazkoak jorratuko dira eta parte-hartzaileen behar eta proposamenak jasoko dituzte. Aldi berean, gune bat irekiko da online, jendeak -nork bere kasa- auzoetan egindako proposamenak osatu ahal izateko.
Gainera, bilerak sarearen bidez segitzen ahalko dira, streaming bidez emanen dituzte-eta Iruña partaidetza da YouTubeko katean.