169.000 euroko aurrekontua dauka Iruñeko Udalak Udaltzaingoaren uniformeak berritzeko, eta bertatik hartuko du oraingo saila ere: 900 polo urdin erosiko dizkie agenteei, 27.441 euro inbertituta. Berrikuntza: urdinak izanen dira oraingo uniformeak.
Gainera, orain arte bezala, euskaraz eta gaztelaniaz izanen ditu inskripzioak, baina bada aldaketa bat: tamaina berean egonen dira bi hizkuntzak, lehenengoz; alegia, euskara gaztelaniaren tamaina berean irakurtzen ahalko da.
Europar Batasunak aholkatzen du Udaltzaingoaren uniformea urdina izatea, eta hala eskatu dute udaltzainen sindikatuek ere.
Polizia, "atseginagoa eta hurbilagoa"
Iruñeko Udalak "gertutasunean oinarritutako Udaltzaingoaren irudi atsegina" lortzeko aldatuko ditu uniformeak, baita Nafarroako gainontzeko udaltzaingoen imajinarekin parekatzeko ere.
Summun Equipamientos S. Coop enpresak ekoiztuko ditu poloak. Heldu den urtean, gainera, mauka motzeko kamisetak, 450 jantzi polar eta 450 txamarreta berri ere emanen dizkiete.